Ni: Lorena C. Casanova

Minsan pa, nagpapakita ng pagkakabuklod-buklod at pagkakaisa ang mga Calaqueño sa pagdaraos ng taunang istasyon ng krus sa ikaapat na pagkakataon. Ito ay naging aktibong gawain ng mga taga-Calaca, kasabay ng pag-alala ng Simbahang Katoliko sa Araw ng Huwebes Santo, simula ng maluklok sa tungkulin ang administrasyong Ona-Atienza.

Noong Marso 20, 2008 maagang nagtipon-tipon ang mga Calaqueño sa bulwagan ng Pamahalaang Bayan upang makiisa sa istasyon ng krus. Ito ay pinasimulan sa pamamagitan ng panalangin na pinamunuan ni Rev. Fr. Richard S. Rodelas para sa Unang Istasyon na nasa harapan ng munisipyo. Sama-samang tinahak ng mga taong nakiisa ang kahabaan ng Madalunot patungong Matipok na kinatatayuan ng labing-apat ng krus.

Halos ay hindi na mabilang ang dami ng mga taong nakiisa. Ayon sa ibang sumasama ito ay naging daan ng kanilang pagpipinitensya. Ang iba naman ay nakapangako para sa kagalingan ng kanilang mga karamdaman. Sabi nga ng iba, hindi sila nakaramdam ng pagod manapa’y ay ginhawa ng pakiramdam at luwag ng kalooban ang kanilang naramdaman.