Ni: Liza Lorena C. Casanova

Hulyo 15, 2010, biglaan ang pananalanta ng bagyong Basyang sa ilang mga barangay sa bayan ng Calaca partikular sa mga coastal barangays at mga taniman sa kabukiran. Ayon sa panayam ng mga kawani ng Municipal Social Welfare and Development Office, Municipal Information Office at Municipal Engineering office, tatlong (3) tahanan ang totally damaged, isa (1) sa barangay Salong na pag-aari ni G. Raymundo Marquez at dalawa (2) mula sa barangay Camastilisan, isang pag-aari ni G. Dondon Noche at isa ay kina Gng. Rochelle Aporgo. Sinasabing ang pagkawasak ng mga tahanan ay dahil sa pagbagsak ng mga punongkahoy. Samantala, may kabuuang siyam (9) na tahanan naman ang naitalang partially damaged dahilan sa pagkalipad ng mga bubong sanhi ng malakas at biglaang hagupit ni bagyong Basyang. Ang pito (7) dito ay matatagpuan sa barangay Salong na pag-aari nina Madelaine Legarte, Lucio De Gala, Ramon Riosa, Angelus De Gala, Librada Castillo, Mary Ann Gutierez at Mercy Talaoc. Isang (1) tahanan mula sa barangay Camastilisan na pag-aari ni Mary Jane Valencia  at isa (1) sa barangay Lumbang Calzada na pag-aari naman ni Maria Macatigbak. Ilang mga imprastraktura ang naapektuhan pa rin ng bagyo sa nasabing bayan. Una na dito ay ang pagkawasak o pagguho ng tulay sa pagitan ng bayan ng Calaca at bayan ng Lemery na kung tawagin ay Sinisian Bridge. Isang malaking pinsala ang dulot nito hindi lamang sa bayan ng Calaca kundi maging sa mga dumadaan dito sanhi ng pagka-antala ng byahe.

Ilang mga paaralan din ang naapektuhan katulad ng pagguho ng bakod sa Dacanlao Gregorio Agoncillo Memorial National High School, pagkalipad ng bubong ng Talisay Primary School sa Barangay Talisay  at ang pagkasira ng bubong ng ilang silid-aralan sa Calaca Central School dulot ng pagbagsak ng punongkahoy.

Ayon naman sa pag-iikot ng mga kawani ng tanggapan ng Pambayang Agrikultor, tinatayang siyamnapung porsyento (90%) ng mga pananim partikular ang mais, palay at halamang gulay ang napinsala ng bagyo. Inaasahang limampung porsyento (50%) ang makakabangon subalit ito ay hindi masasabing tuwirang mapapakinabangan. Dahil sa mga nasabing kapinsalaan kaagad na umisip at kumalap ang lokal na pamahalaan ng Calaca ng mga pamamaraan kung paano ibabangon at isasalba ang mga mamamayan sa nasabing mga kapahamakang dulot ng kalamidad.

Tinatayang nasa Php 8,400,000.00 ang kabuang halaga ng danyos ng bagyong ito sa mga pampublikong istraktura at imprastraktura habang may kabuang halaga naman na Php 480,000.00 sa sektor ng agrikultura.