Ni: Cristy Balitustos

Lubhang naalarma ang mga magsasaka sa bayan ng Calaca dahil sa pananalasa ng Army Worms sa mga taniman partikular sa halamang kapamilya ng mais. Ang army worm ay larvae stage ng isang moth o gamu-gamo. Ayon sa paliwanag ng Regional Crop Protection Center (RCPC) na gumawa ng pagsusuri sa nasabing peste, tinawag itong Army Worm dahil sa sumasalakay ito na may kasamang isang grupo o batalyon sa isang taniman at kagyat na lumilipat sa karatig na mga tanim matapos ang pananalasa.

Unang namataan ang mga insektong ito noong ika-1 ng Hulyo sa barangay Makina at nasundan ng parehong ulat sa barangay Dila. Bilang tugon agad nagsagawa ng pag-bisita sina Jay Atienza, Jovi Mercado, Cristy Balitustos, Joel Cabello, Rustico Marquina na mga empleyado sa tanggapan ng Pambayang Agrikultor kasama si Taciana Bitang mula sa Office of the Provincial Agriculture. Tiniyak kung anong klase ng uod at ang pag-atake nito o pagsira sa pananim. Nagsagawa sila ng biological method o natural na pamamaraan kung saan matitigil na ang pamumuksa sa pamamagitan nito. Inirekomenda rin ang paggamit  ng lason o pesticide para sa agarang pagpuksa ng insekto. Kaagad ding ipinarating ang suliranin sa tanggapan ng Punumbayan at Tanggapan ng Panlalawigang Agrikultor. Ikinonsulta din ito sa mga pesticide company tulad ng (Syngenta Philippines) para sa angkop na pestisidyo na makapupuksa sa nasabing insekto.

Noong ika- 6 ng Hulyo taong kasalukuyan, dumating sa bayan ng Calaca ang mga kinatawan ng RCPC upang siyasatin ang naging suliranin sa uod. Sa kanilang pakikipagpanayam sa Municipal Agriculturist, Agricultural Technicians, Municipal Administrator at ilang magsasaka, ipinaliwanag nila ang ikot ng buhay ng uod at kung saang estado ito lubhang mapanganib sa halaman, gayun din kung ano ang dapat maging hakbang ng mga magsasaka. Kaagad na naglaan ng pondo ang pamahalaang lokal ng Calaca upang makabili ng lason na ipinamahagi sa bawat barangay na apektado. Batay sa pagsusuri ng mga kawani ng Pambayang Agrikultor tinatayang nasa mahigit na 60% ng kabuuang lawak ng taniman sa bawat barangay ang apektado sa pananalasa ng pesteng uod. At habang sinusulat ang ulat na ito, may kabuuang tala ang Tanggapan ng Pambayang Agrikultor na 24 na barangay na lubhang apektado ng nasabing peste at patuloy na tinutugunan ang pestisidyong kailangan ng mga magsasaka.