Noong ika-3 ng Hulyo 2010 binuksan ang ONA-ATIENZA INTER-BARANGAY SPORTS LEAGUE. Sinimulan  ito sa pamamagitan ng parada mula sa harap ng pamahalaang bayan patungong municipal gymnasium na pinangunahan ni Vice-Mayor Larry Atienza at ng mga miyembro ng Sangguniang Bayan. Binubuo ng dalawampung (20) koponan ang lumahok sa basketball na kinabibilangan ng Camastilisan, Lumbang Calzada, Madalunot, Poblacion 1- 6, Sinisian, Puting Bato East, Puting Kahoy, Talisay, Bagong Tubig, Quizumbing, Calantas, Coral ni Lopez at Timbain at ng naimbitahang Calaca LGU. Mayroon namang sampung (10) koponan ang sumali sa palarong softball. Kinabibilangan ito ng team ng Dacanlao, Dila, Lumbang na Bata, Madalunot, Matipok, Pantay, Niyugan, Puting Kahoy, Sitio Bancoro ng Barangay Timbain at Calaca LGU.

Matapos ang parada ay idinaos ang simpleng programa sa municipal gymnasium. Isa-isang naghatid ng mensahe ang mga opisyales ng lokal na pamahalaan. Nakatawag pansin ang pagrampa ng mga naggagandahang muse na kumatawan sa bawat team. Napili bilang Ms. Basketball 2010 si Ciara M. De Joya mula sa Poblacion 1 at Ms. Softball 2010 si Sherry Rose G. Ecamina ng Lumbang na Bata. Nakamit naman ng koponan ng Quizumbing ang Best in Basketball Uniform at koponan ng Madalunot ang Best in Softball Uniform. Sa unang yugto ng larong basketball nagsagupaan ang koponan ng Camastilisan vs Sinisian sa first game kung saan nanalo ang Camastilisan. Sa second game naman ay LGU vs Poblacion 2 na pinagwagian ng huli at sa 3^rd game ay nagsagupaan  ang Lumbang Calzada at Puting Bato East at nasungkit ng Puting Bato East ang panalo. Kinabukasan ay nagsimula ang sagupaan sa larong softball kung saan ang bawat team ay nabigyan ng pagkakataong makapaglaro.

Naging matagumpay ang pagbubukas ng palaro sa pagpupunyagi nina SK Federation President Emilyn D. Alcazar bilang Chairman ng SB Committee on Youth & Sports Development at Konsehal Robenson Sale bilang Vice-Chairman. Buong pwersa naman itong sinuportahan ng mga miyembro ng Sangguniang Bayan sa pangunguna ni Vice Mayor Larry Atienza katulong ang ilang kawani ng lokal na pamahalaan.