Si Vice Mayor Larry Atienza ang uupong punumbayan ng Calaca dahil sa pansamantalang pagbabakasyon ni Mayor Nas Ona na tatagal ng dalawampu’t isang araw.  Pansamantalang magbabakasyon si Mayor Nas Ona sa pagseserbisyo sa bayan ng Calaca para sa isang biyahe sa Europa hindi upang mag-relax ngunit para samantalahin ang pagkakataon na makadalaw sa mga Pilipinong naninirahan at nagtatrabaho doon partikular ang mga taga-Calaca.

Sa kauna-unahang pagkakataon mula ng  mahalal na punumbayan, ngayon lang niya magagawa ang ganitong bagay. Ayon sa kanya, ang kanyang trip ay mahalaga dahil mabibigyan siya ng pagkakataon na makadaupang-palad ang mga kababayan na pakiramdam niya’y iisa lang ang tungkuling kanilang ginagampanan ng mga Calaqueñong nagtatrabaho doon. Siya bilang ama ng Bayan ng Calaca ang dumidinig ng lahat ng daing ng kanyang kababayan sa nasasakupan, nagpupuno ng kakulangan ng kailangan ng kanyang kababayan at pinipilit na laging magdulot ng kaluguran sa mga mamamayan. Katulad din ng mga Pinoy OFW sa Europa na ginagawa ang lahat ng makakaya upang bigyang ginhawa at makatulong sa bawat miyembro na pamilya at patuloy na nagsusumikap na maiangat ang antas ng kabuhayan ng kanyang sambahayan. Kahit nasa malayong lugar, bukas din lagi ang kanilang puso upang makinig sa mga hinaing ng pamilya sa Pilipinas at nakikibahagi sa bawat saya at kalungkutan na nararanasan. 

Samantala, bagamat pansumandaling aalis ang alkalde, wala namang dapat ikabahala ang mga taga-Calaca. Ito ay dahil ang tatayong ama ng bayan ng Calaca ay kasing sigasig at sinsero niya sa pagliligkod sa bayan katuwang ang buong puwersa ng Sangguniang Bayan.