Noong ika-12 ng Hunyo 2010 tatlong bagong pari ang dumating sa parokya ng San Rafael Arkanghel sa Bayan ng Calaca. Ipinakita ng sambayanang Calaqueño ang pagkakaisa sa pamamagitan ng mainit na pagtanggap sa nasabing mga pari. Pormal na isinalin sa kanila ng mga dating pari ang mga dokumento at mga nakaatang na tungkulin bilang bagong tagapamahala ng parokya. Malugod namang tinanggap ni Rev. Fr. Aurelio Oscar Dimaapi ang kanyang magiging obligasyon bilang Kura Paroko, at nina Rev. Fr. Remigio Mendoza at Rev. Fr. Noel Abutal bilang Parochial Vicars. Si Rev. Fr. Abutal din ang magpapatuloy ng pamamahala sa St. Raphael Archangel Parochial School. Bahagi ng magandang ugnayan ng lokal na pamahalaan at simbahan, inanyayahan ni Mayor Sofronio “Nas” C. Ona, Jr. ang tatlong (3) pari sa flag raising ceremony noong ika-22 ng Hunyo taong kasalukuyan. Ipinakilala ang tatlo (3) sa mga kawani ng lokal at nasyunal na tanggapan ng pamahalaang bayan ng Calaca upang maging kaagapay sa pagpapatupad ng maayos, maganda at matapat na layunin tungo sa matagumpay at maka-Diyos na paglilingkod.