Enero
26, 2010, masiglang ipinagdiwang ng buong pamilya ng pamahalaang lokal ang
ika-1 taong anibersaryo ng pagkakatatag ng bagong bahay-pamahalaan. Pinasimulan
ang okasyon sa pamamagitan ng paghahain ng banal na misa ng pasasalamat, ganap
na ika-8:00 ng umaga sa bulwagan ng gusali na pinangunahan ni Rev. Fr.Simplicio Datingginoo. Sinundan ito ng pagsindi
sa mga paputok at pagpapakawala ng mga balloons bilang hudyat ng pagdiriwang. Kagunay
nito, ginanap ang simpleng palatuntunan sa harap ng gusali na sinaksihan ng
mamamayang Calaqueño partikular ang mga opisyales at kawani ng lokal na
pamahalaan gayundin ng mga opisyales ng barangay at mga LUNAS Volunteer
Workers.
Naghatid ng makabuluhang mensahe ang mga opisyales ng lokal
na pamahalaan sa pangunguna ni Mayor Nas Ona at Vice Mayor Larry Atienza.
Samantala, binigyang daan naman ang pagdating at paghahatid ng mensahe ng
mahusay na Representante ng Unang Distrito ng Batangas, Kgg. Eileen
Ermita-Buhain. Bukod sa mga mensaheng narinig sa mga nagsalita, nagbigay
kasiyahan ang pampasiglang bilang mula kay Roxanne Makatigbak, isa sa mga ONA
Scholars at mga kawani ng lokal na pamahalaan. Ipinakita rin sa isang video
presentation ang lahat ng kaganapan, programa at proyektong naisakatuparan ng
pamahalaang bayan sa buong isang taon. Bagaman isang taon pa lamang ang
pinaglakaran o ang pananatili sa bagong munisipyo halos hindi na mapapantayan
ang mga magagandang ala-alang naisagawa. Inaasahang ang lahat ng magagandang
pangyayaring naganap ay patuloy pang magaganap habang ang administrasyon nina
Mayor Nas Ona at Vice-Mayor Larry Atienza ay mananatiling nakaluklok sa
tungkulin kasama ang mga taong patuloy na nakasuporta at nakatayo sa likod ng
administrasyon.
Matapos
ang maikling programa, nagkaroon ng pamamahagi ng honoraryum sa mga LUNAS
Volunteer Workers para sa huling quarter ng taong 2009 na lalong ikinasiya ng
mga volunteers.
Malaking pagtitipon ng mga kabataang Calaqueño ang ginanap
noong ika-26 hanggang ika-27 ng Disyembre, 2009 sa pamahalaang bayan ng Calaca
bilang bahagi ng pakikiisa sa pagdiriwang ng Linggo ng Kabataan. Humigit-kumulang
sa apat na daang (400) kabataan ang dumalo mula sa apatnapung barangay sa bayan
ng Calaca sa SK Youth Camp 2009 alinsunod sa ipinag-uutos ng Local Government
Code RA 7160, Chapter 10, Section 439. Layunin nito na hikayatin ang mga kabataan
na maging huwaran at mabuting lider. Bahagi nito, ang mga dumalo ay nagkaroon
ng seminar workshop na may temang “Encounter of the Next Generation Leaders”
kung saan iba’t ibang aktibidad ang itinuro sa kanila katulad ng pagkakakitaan
o hanap-buhay, pangangalaga sa kapaligiran, pagpapahalaga sa kultura at sining,
kampanya laban sa ipinagbabawal na gamot, pagkakaroon ng libangan at laro na
makatutulong sa pangangalaga ng kalusugan. Maayos namang naunawaan ng mga
dumalo ang nasabing mga paksa sa pamamagitan ng mahuhusay na tagapagsanay na
sina Konsehal Deovic Ontangco, Konsehal Robenson Sale, Gng. Cristy Balitustos
at G. Nickson Cuyom. Matagumpay na naisakatuparan ang programa sa pangunguna ni
Kgg. Emilyn Alcazar, Pangulo ng Pederasyon ng Sangguniang Kabataan sa
pamamagitan ng mainit na suporta ni Mayor Nas Ona, Vice Mayor Larry Atienza mga
miyembro ng Sangguniang Bayan (Magnificent Seven) at ng ilang tanggapan ng
lokal na pamahalaan.
Magmula noon ay nangaral na si Jesus. Ang sabi Niya,
“Pagsisihan ninyo’t talikdan ang inyong mga kasalanan sapagkat nalalapit nang
maghari ang Diyos” Mateo 4:17
Ganun
din naman madalas nating marinig ang katagang ito, “Ang paalala’y gamot sa
taong nakakalimot”. Ang Biblia ay naglalaman ng mga paalala, isa na dito ang
pagsisihan at talikdan ang ating mga kasalanan. Paalala na wari ba’y
ipinagwawalang bahala natin. Bilang mga tao, patuloy pa din tayo sa pag-iisip ng
‘di-maganda sa ating kapwa, pagsasalita ng masama at kung minsan o madalas
paggawa ng hindi tama sa paningin ng tao lalo na sa paningin ng Diyos.
