Muli na namang nagpakitang gilas ang mga kapulisan ng Bayan ng Calaca sa pamumuno ni PCI Raymund Gary R. Mayuga sa pagsugpo sa paglaganap ng ipinagbabawal na gamot at pag-aresto sa mga taong pinaghahanap ng batas.

Noong ika-12 ng Nobyembre 2009, ganap na ika-1:00 ng hapon, sa kalye Marasigan, Barangay Poblacion 3 ay nadakip si Gavino Castromero y Villaranda alyas Benny, 43 taong gulang, may asawa, walang hanap-buhay at naninirahan sa Barangay Poblacion 4 sa kasong paglabag sa Batas Pambansa Blg. 6 (illegal possession of deadly weapon). Nahaharap din ang mga suspek sa kasong pag-iingat ng ipinagbabawal na gamot (shabu) o paglabag sa section 11 ng Republic Act 9165 (Dangerous Drug Act of 2002).

Samantala, ika-9 ng Disyembre 2009, ganap na ika-11:00 ng umaga ay naaresto ng pinagsanib na puwersa ng pulis Calaca at kagawad ng Batangas Criminal Investigation and Detection Group (CIDG) sa Sitio Pag-asa, Barangay Pantay ang apat na kalalakihan at isang babae sa kasong paggamit (pot session) at pag-iingat ng ipinagbabawal na gamot (Violation of Section 11 and Section 15 of Republic Act 9165. Nakilala ang mga nasakote sa pangalang Paul Vladimir Monte Claro Y Ardino, 26 na taong gulang, may asawa, walang hanap-buhay, tubong Tuy Batangas at Joel Secreto, Y Arbas, 32 taong gulang, may-asawa, karpintero.  Kasama ring nahuli sina Juanito Dela Cruz Y Tamarion, 33 taong gulang, binata, walang hanap-buhay, tubo sa Purok 9, Muntinlupa City, Jerry Mendoza Y Campos, 26 na taong gulang, may-asawa, binata, karpintero at Rodesa Viray Y Campos, dalaga, walang hanap-buhay, tubo sa Purok 7, Muntinlupa City at lahat ay kasalukuyang naninirahan sa Sitio Pag-asa, Barangay Pantay, Calaca, Batangas.

Dagdag pa rito, noong ika-12 ng Oktubre 2009, ganap na ika-10:45 ng umaga nahuli ng mga kagawad ng pulisya si Jeric Abad Y San Gabriel, 33 taong gulang, may- asawa, kargador at naninirahan sa Barangay Lumbang Calzada nang nabanggit ding bayan. Dinampot ng mga operatiba ang suspek sa bisa ng Warrant of Arrest na nilagdaan ni Judge Vicente Montes ng MTC Calaca sa kasong tangkang pataksil na pagpatay (Attempted Murder). At ilang araw bago magpasko, pinangunahan ni PINSP Davis A. Locloc ang pagdampot kay  Aurelio Manalo Y Magnaye, 38 taong gulang, may asawa, at magsasaka ng Barangay Cahil noong ika-19 ng Disyembre 2009, sa kasong panggagahasa (2 counts) sa bisa ng warrant of arrest na nilagdaan ni Judge Carolina De Jesus ng RTC Branch 9, Balayan. Ang nasabing akusado ay number 3 sa listahan ng Top Ten Most Wanted Person sa Bayan ng Calaca.