Ni: Lorena C. Casanova

Taong 1982, isinilang ang isang malusog at may kakaibang gandang sanggol na babae na nagngangalang Bernadette (kilala sa tawag na Dedette) sa tahimik na barangay sa bayan ng Calaca, ang Lumbang na Bata.

Si Dedette ay pangalawa sa tatlong supling ng mag-asawang Agnes J. Endaya, R.N at Engr. Gregorio V. Magnaye. Ang dalawa niyang kapatid ay sina Shieryl (Physical Therapist) at Knette na kasalukuyang nag-aaral ng nursing. Lumaki, nagkaisip at nagdalaga si Dedette sa piling ng kanyang Lolo Eufronio  “Ponying” kung tawagin at Lola Mameng Endaya. Samantalang minabuti ng kanyang responsableng mga magulang na magtrabaho sa ibang bansa upang maitaguyod ang kanilang tatlong anak. Hinubog at pinag-aral si Dedette ng elementarya sa isang simpleng eskwelahan sa Coral na Munti sa bayan ng Agoncillo Batangas. Nagtapos siya ng kurikulum noong 1996 bilang class valedictorian kalakip ang iba’t ibang parangal katulad ng Governor Mandanas Achievement Award, Girl Scout Leadership Award at First Place-Home Makers of the Philippines sa Regional Level.

Ipinagpatuloy niya ang kanyang pag-aaral sa mataas na antas sa isang kilalang eskwelahan sa unang distrito ng Batangas ang Our Lady of Caysasay Academy (OLCA) sa bayan ng Taal. Buong sikap na ibinuhos ng dalaga ang kanyang dedikasyon sa pag-aaral kaya naman nagtapos siya ng sekundarya noong 2000 at napabilang sa honor roll.

Dahil sa tiyaga na may kalakip na mataas na pangarap, ipinagpatuloy niya ang kanyang pag-aaral sa kolehiyo. Kumuha siya ng kursong Medical Technologist sa Far Eastern University-Nicanor Reyes Medical Foundation sa Lungsod ng Maynila. Nagtapos siya noong taong 2004, at ginawaran ng pagkilala bilang Most Proficient Intern sa paaralan. Sa labis na pagod ng kanyang isipan sa pag-aaral naisip niyang magpahinga upang makapag-relax ang katawan at ang isip na halos ay umabot sa dalawang taong pamamahinga. Subalit noong taong 2006 muling sinimulan ang kanyang pakikibaka. Napag-isipan niyang kumuha ng board examination. Dahil sa magandang kapalarang tinataglay nakapasa siya at naging isang Registered Medical Technologist. Hindi pa rin tumigil si Dedette upang abutin ang kanyang napipintong mataas na pangarap, kung kaya nagdesisiyon siyang ipagpatuloy ang kanyang pag-aaral sa medisina sa nasabi ding paaralan. Hindi naglaon, nakatapos siya ng kursong medisina na kaagad kumuha ng board exam nitong buwan ng Agosto at mapalad ding nakapasa ng buwang iyon. Sa kanyang edad na dalawampu’t pito (27) ginugugol niya ang kanyang panahon sa pagse-serbisyo sa mga taong nangangailangan sa anim na kilalang ospital sa Lungsod ng Maynila, kabilang ang East Avenue Medical Center, Rizal Medical Center, Philippine Orthopedic Center, Fe Del Mundo Hospital, Metropolitan Medical Center, United Doctors Medical Center at National Center for Mental Health Hospital.

Dahil sa magagandang karanasan at husay na ipinamalas ni Badette maituturing siyang isang yaman ng bayan ng Calaca sapagkat saan man siya pumunta ay dala-dala niya ang kanyang titulo at ang pagiging isang tunay na Calaqueño.