Ni: Jennifer R. Asilo

Tinanghal bilang kampeon ang mga batang may kapansanan mula sa SPED class ng Dacanlao Gregorio Agoncillo Elementary School sa bayan ng Calaca matapos magpakitang gilas sa larangan ng pagsayaw (Junior Division) sa katatapos lamang na National Prevention on Disability Rehabilitation Week Celebration na ginanap sa SM City Event Center noong ika–27 ng Hulyo 2009. Ang nasabing selebrasyon na kinapapalooban ng iba’t ibang patimpalak tulad ng Water Color Painting, singing contest, poster making at dance contest na may junior at senior division. Ang mga ito ay nilahukan ng iba’t ibang bayan mula sa probinsya ng Batangas kasama na ang bayan ng Calaca. Tatlumpu’t tatlong (33) bata na may kapansanan kasama ang kanilang mga magulang ang nakiisa sa selebrasyon at lumahok sa larangan ng pagkanta sa pamamagitan ni Joseph Mendoza ng Barangay San Rafael na may kapansanan sa mga paa. Samantala, ang patimpalak sa larangan ng pagsasayaw ay sinalihan nina Troy Jamil Manguerra, Romy Tumbaga, Mike Jacob Bande at Paul Vincent Guevarra na kapwa mga mag-aaral din sa nasabing paaralan. Ang mga batang nakilahok ay matiyagang tinuruan ng kanilang SPED teacher na si Gng. Igleceria Alvarez.

Tunay ngang nakakatuwang isipin na hindi hadlang ang kanilang kapansanan upang maipakita ang kanilang kakayahan at mabansagang kampeon sa iba’t ibang larangan.