Ni: Lorena C. Casanova

Sa loob ng tatlong buwan sa taong 2009, matagumpay na naisakatuparan sa limang barangay ng Calaca ang Nasa Nayon Ang Serbisyo Barangayan Program Season 2, ang serbisyong minsan pa’y naipangako sa taong bayan ng kasalukuyang administrasyon. Idinaos ang nasabing programa sa Barangay Cahil noong ika- 8 ng Enero at sinundan naman ng barangay Calantas noong ika- 22 ng buwan ding iyon. Samantala noong ika- 12 ng Pebrero matagumpay ding isinagawa ang programa sa barangay Puting Bato East at sa barangay Talisay naman noong ika- 26 ng Pebrero. Isinagawa din ito sa barangay Puting Kahoy noong ika- 12 ng Marso. At tiyak na magpapatuloy ang nasabing programa sa mga natitirang barangay gaya ng naipangako ng administrasyon ni Mayor Nas Ona at Vice-Mayor Larry Atienza.

Layunin ng nasabing programa na mailapit at maihatid sa mga barangay ang serbisyo ng lokal na pamahalaan na kinapapalooban ng medikal at dental mula sa tanggapan ng Pambayang Kalusugan, mga serbisyong Pang-Agrikultura (pamamahagi ng mga binhing pananim, pagtuturok ng mga alagang hayop, food demo at pagpapakain sa mga bata). Mula naman sa tanggapan ng Pambayang Kagalingang Panlipunan at Pagpapaunlad, dala ang serbisyong libreng gupit, manicure, pedicure, masahe, pagtatala ng mga senior citizen at pag-oorganisa ng Out of School Youth. Kabahagi rin ang tanggapan ng Pambayang Tagatalang Sibil upang magsagawa ng libreng pagkakasal, pagpaparehistro ng mga bata at pagsasaayos ng mga sertipiko na may kaugnayan sa tanggapan.

Upang kumuha naman ang mga taong barangay ng kanilang Community Tax certificate ay kabahagi din ang tanggapan ng Pambayang Ingat-yaman sa kaukulang bayad. Naghahatid naman ng munting kasiyahan ang tanggapan ng Pambayang Pangkabatiran (Municipal Information Office) sa pamamagitan ng NAS NAS Videoke Singing Challenge na sinasalihan ng dalawang kategorya, sampung (10) matatanda para sa mga senior citizen at sampung (10) bata naman na may edad anim hanggang labindalawa para sa mga bulilit kids. Ang grupo naman ng PNP ay nagtuturo sa mga LUNAS Kapayapaan Volunteers ng tamang pagtupad ng tungkulin sa nasasakupang barangay habang ang Fire Department naman ay nagbibigay kaalaman upang maiwasan ang sakuna dulot ng sunog.