Lumapit tayo sa Diyos, ang palaala sa atin ng Biblia, sapagkat ang handog Niya ay kapahingahan sa ating mga pagod na kaluluwa.

Nadarama natin ngayon ang iba’t ibang suliranin na kinakaharap ng ating lipunan, matinding krisis at kahirapan, pagsasara ng maraming mga kumpanya, krimen at iba pa. Mga suliranin o problemang kinakaharap natin sa loob ng ating pamilya. Katulad ng sabi Niya sa Kanyang Salita “Mayroon Kayong Kapighatian dito sa sanlibutan” Juan 16:33

Sa mga panahong katulad nito, kailangan natin ang kapahingahang nagmumula sa Panginoong Jesu Cristo! At siya ang nagsabi sa ating, “Lumapit kayo sa akin.” Sa Kanya mararanasan natin ang kapahingahang hinahanap natin. Sapagkat ang kapighatiang nararanasan natin ay ginawa hindi para tayo ay masira o mawasak, kundi para tayo ay yumukod sa Kanya. (Difficulties are designed not to break us, but to bend us toward God.)

Pasanin natin ang pamatok Niya, higit sa mga pasaning ating dala-dala, sapagkat maginhawang dalhin ang kanyang pamatok, at maayos ang Kanyang pasaning ibibigay sa atin. Katulad ng paalala sa atin ng  1 Cor. 10:13, “Wala pang pagsubok na dumating sa inyo na hindi pa dinanas ng lahat ng tao. Tapat ang Diyos, at hindi niya ipapahintulot na kanyang subukin ng higit sa inyong makakaya. Sa halip, pagdating ng pagsubok, bibigyan niya kayo ng lakas upang mapagtagumpayan iyon.  Habang pinapasan natin ang kanyang pamatok, mag-aral tayo sa Kanya, sapagkat siya ay maamo at mababang loob. Buong tiyaga niya tayong tuturuan ng kanyang mga tuntunin at pamamaraan, kung papasanin natin ang pamatok na kanyang ibinibigay!