Para sa Higit na Nakararami, Pinasinayaan Para sa Kinabukasan

Ni: Lorna L. Aquino, MIO

Buong galak na ipinagbunyi ng buong sambayanang Calaqueño ang pormal na pagpapasinaya at pagbabasbas ng bagong bahay pamahalaan noong ika-26 ng Enero ng taong kasalukuyan. Ang makasaysayang pagdiriwang ay dinaluhan ng mga kilalang personalidad sa larangan ng pulitika, industriya at showbiz. Kabilang sa mga dumalo sina Executive Secretary Eduardo R. Ermita, Gov. Vilma Santos-Recto, Congresswoman Eileen Ermita-Buhain, buong Sangguniang Panlalawigan sa pamumuno ni Vice Gov. Marc S. Leviste at mga hepe ng iba’t ibang tanggapang Panlalawigang Pamahalaan. Dumalo rin sa okasyon ang mga punumbayan ng mga karatig bayan, mga pinuno ng mga pribadong kumpanya sa bayan ng Calaca, sektor ng edukasyon, simbahan, mga organisasyon at mga mamamayan ng nasabing bayan.

Dinumog din ng maraming yagahanga mula sa mga karatig bayan ang pop star princess na si Sarah Geronimo na umawit ng kanyang mga popular na mga awitin.

Samantala, ang pagbabasbas ng bagong gusali ay pinangunahan ng labindalawang pari na karamihan ay nanilbihan sa Parokya ni San Rafael. Nagsilbing ninong at ninang ng iba’t-ibang tanggapan ang mga piling bisita na dumalo na nagmula sa iba’t-ibang publiko at pribadong tanggapan na personal na napili ng mga hepe ng departamento ng lokal na pamahalaan.

Naging madamdamin naman ang mensahe ng Punumbayan ng Calaca, Kgg. Sofronio “NAS” C. Ona, Jr. habang inilalahad ang mga pinagdaanan ng kanyang administrasyon bago naipatayo ang nasabing istruktura. Maliwanag na binigyang-diin ng alkalde na ang kanyang political will ang naging sandata niya upang makalikom ng pondong ginugol sa pagpapagawa ng gusali na nagmula sa pondo ng lokal na pamahalaan at wala kahit isang kusing na inutang. Ayon pa rin sa kanya, bagama’t sa simula ay may mga tumutol at may hindi naniwala sa katuparan sa pagpapatayo ng bagong mukha ng bahay pamahalaan ng Bayan ng Calaca. Malaki ring bahagi ang naging suporta ng mga opisyales at empleyado ng munisipyo, gayon din ng mga Calaqueño na higit na naniwala sa mga adhikain ng administrasyong ONA-ATIENZA.

Kasabay ng nasabing pagdiriwang, isinagawa din ang pagbabasbas ng bagong gusali na pinangunahan ng labingdalawang pari na karamihan ay nanilbihan sa Parokya ni San Rafael. Nagsilbing ninong at ninang ng iba’t ibang tanggapan ang mga piling bisita na dumalo na nagmula sa iba’t ibang publiko at pribadong tanggapan na personal na napili ng mga hepe ng departamento ng lokal na tanggapan.