Nakagagalak isipin na ang bayan ng Calaca at ang mga mamamayan  Calaqueño ay nagpapahalaga sa mga yaman ng kalikasan at pangangalaga sa kagandahan ng kapaligiran. Ito’y napatunayan noong ika-22 ng Agosto kung saan inilunsad ang sabayang pagtatanim ng puno sa buong Calaca na may temang “NASa Puno ang Buhay Mo”, isang programang tinutukan ng Pambayang Agrikultor na handog ng masipag at maprinsipyong Punumbayan, Sofronio C. Ona, Jr. at sinuportahan ng Sangguniang Bayan na pinamumunuan ni Kgg. Lordilando DM. Atienza. Naging kabahagi sa pagtatanim ang mga kawani ng Pamahalaang Lokal ng Calaca, Sangguniang Barangay at LUNAS Volunteer Workers ng bawat Barangay, DepEd at NGOs.

Samantala noong ika-26 ng Agosto, isinagawa naman ang pagtatanim sa Barangay Puting Bato East kung saan naging kabahagi ng programa ang mga delegado ng Eagle Boy Scout- Batangas Council, ang staff ng Eagle Boy Scouts Board of Review, Sangguniang Barangay ng Puting Bato East at mga Volunteer Workers. Nakibahagi din sa nasabing aktibidad ang mga kawani ng Municipal Information Office at Pambayang Agrikultor, Miyembro ng Sangguniang Bayan at kinatawan ng Bacnotan Union Industrial Park (BUIP).

Ang Tanggapan ng Pambayang Agrikultor at ang Tanggapan ng Bacnotan Union Industrial Park ang namahagi ng mg punong itinanim sa buong bayan ng Calaca na may kabuuang bilang na tatlumpong libo (30,000) na kinabibilangan ng sampung libo at limang daang (10,500) puno ng gemelina, limang libong (5,000) puno ng neem tree, at labing limang libong (15,000) puno ng mahogany. (MIO & Mun. Agriculture)