|
Ni: Marlon A. Gomez
(LUNAS Kabatiran Volunteer Worker) Simula ng maluklok sa tungkulin ang mga nahalal na opisyales ng Barangay Niyugan sa pamumuno ni Kapitan Geronimo Siscar, unti-unting nagkakaroon ng pagbabago sa barangay. Aktibo ang mga opisyales sa pagsasagawa ng palagiang pagpupulong tuwing unang araw ng buwan. Nakapagpasa na rin ng walong (8) Resolusyon sa Tanggapan ng Senado, Tanggapang Panlalawigan, sa Kgg. na Representante ng Unang Distrito ng Batangas, EILEEN ERMITA-BUHAIN, at gayun din sa Tanggapan ng butihing Punumbayan Nas Ona.
Samantala, alinsunod sa kahilingan ng mga kabataan ay nagkaroon ng Inter-Color Basketball League sa barangay na sinimulan noong ika-8 ng Marso 2008 at natapos noong ika-29 ng Marso taong kasalukuyan. Naipakongkreto na rin ang di-kahabaang sukat ng daan na dati ay naging balakid sa mga dumaraang sasakyan kung panahon ng tag-ulan. Ito ay may sukat na tatlumpu’t isang metro (31) pahaba at may lapad na tatlong (3) metro na nagkakahalaga ng walumpung libong piso (Php 8,000.00) mula sa Internal Revenue Allotment (IRA) ng barangay. Naging bahagi rin ang naturang barangay ng mga proyekto mula sa lokal na pamahalaan sa kabutihang loob ni Mayor Nas Ona, Vice-Mayor Larry Atienza, at lahat ng bumubuo ng Sangguniang Bayan. Mula sa tanggapan ng Pambayang Agrikultor naman nabiyayaan ang ilang residente ng nasabing barangay ng mga butong pananim, katulad ng talong at sitaw na ipinagkaloob kay G. Efren Casanova. Sang-ayon kay G. Casanova ay malaking tulong ang naidulot nito sa pang araw-araw na pangangailangan. Sinundan ito ng pamamahagi ng buto ng papaya at organikong pataba sa pamamagitan pa rin ng nasabing tanggapan sa tulong din ng mga Seed Companies, kabilang ang Allied Botanical Seed Company at Ramgo International na laging nakaagapay upang tulungan ang mga magsasaka sa barangay. Sampung (10) tagapakinabang sa barangay Niyugan ang nabigyan ng butong papaya na kinabibilangan nina G. Efren Casanova (135 puno), G. Filomeno Casanova (135 puno), G. Mario Casanova (135 puno), G. Rufo Alamag (135 puno), G. Albert Alamag (135 puno), G. Ronald Bautista (135 puno), G. Melquiades Endaya (135 puno), G. Jessie Gomez (135 puno) at G. Allan De Ocampo (135 puno) na may kabuuang isang libo tatlong daan at limampung (1,350) puno. Dahil dito, nagkakaroon ng katuparan ang matagal ng hinahangad ng mga residente ng Barangay Niyugan na maging isang maunlad na pamayanan na uugit sa isipan ng mga mamamayan “Onward to New Aspirations”. |
